Магни = зөвхөн шөрмөс татахад хэрэглэдэг эрдэс биш

Магни = зөвхөн шөрмөс татахад хэрэглэдэг эрдэс биш

Шөнө хөл татах, булчин чангарах үед л магни санаанд ордог уу? Гэхдээ магни нь зөвхөн булчинд бус мэдрэлийн тогтолцоо, нойр, энергийн солилцоо, зүрх, яс зэрэг биеийн олон чухал үйл ажиллагаанд оролцдог эрдэс юм.

Магнийн хэрэглээ хангалтгүй байх үед хүн бүрт ижил шинж илрэхгүй ч булчин татах, ядрах, сульдах, мэдрэл-булчингийн сэрэмтгий чанар нэмэгдэх зэрэг зовиур ажиглагдаж болно. Тиймээс магнийн үүргийг зөвхөн “шөрмөс таталт”-аар хязгаарлаж ойлгох нь учир дутагдалтай.

1. Булчин агшихаас гадна сулрахад магни хэрэгтэй

Булчин хэвийн ажиллахын тулд агших, сулрах хоёр үйл явц ээлжлэн явагддаг. Кальци булчингийн агшилтад чухал үүрэгтэй бол магни нь кальцийн хөдөлгөөн болон мэдрэл-булчингийн сэрлийг зохицуулахад оролцдог.

Магни хангалтгүй үед мэдрэл-булчингийн сэрэмтгий байдал нэмэгдэж, зарим хүнд шөрмөс татах, булчин таталдах, чангарах зэрэг шинж илэрч болно.

2. Магни мэдрэлийн тогтолцоог “Тайвшруулахад” оролцдог

Бидний тархи, мэдрэлийн эсүүд байнга цахилгаан-химийн дохиогоор харилцдаг. Энэ сэрэл хэт ихэсвэл тайван бус болох, бие чангарах зэрэг мэдрэмж төрж болно.

Магни нь мэдрэлийн эсийн сэрлийг зохицуулах хэд хэдэн механизмд оролцдог. Тухайлбал NMDA рецепторын хэвийн зохицуулалтад оролцож, мэдрэлийн эс хэт сэрэхээс хамгаалахад туслаж тайвшруулдаг.

Энгийнээр хэлбэл, магни нь тархийг “унтраадаг” бодис биш. Харин мэдрэлийн сэрэл ба тайвшралын хэвийн тэнцвэрийг хадгалахад шаардлагатай эрдэс юм.

3. Нойр муудахад магни ямар холбоотой вэ?

Унтахын өмнө бие болон мэдрэлийн тогтолцоо аажмаар тайван төлөвт шилжих шаардлагатай. Магни нь мэдрэлийн дамжуулалт, булчингийн сулрал болон нойр-сэрэх хэмнэлтэй холбоотой физиологийн үйл ажиллагаанд оролцдог.

Тиймээс магнийн хэрэглээ хангалтгүй зарим хүнд магнийн хэрэгцээг нөхөх нь тайвшрах, булчин сулрах, нойрны хэвийн үйл ажиллагааг дэмжихэд тустай.

4. Магнигүйгээр энерги “үүсэхгүй”

Магнийн хамгийн сонирхолтой үүргүүдийн нэг нь энергийн солилцоо юм.

Бидний эсүүд энергиэ ATP хэмээх молекулын хэлбэрээр ашигладаг бөгөөд ATP-ийн олон биохимийн урвалд магни шаардлагатай. Тиймээс магни нь хоол хүнснээс авсан энергийг эсүүд ашиглах үйл явцад оролцдог.

Энэ нь “магни уугаад шууд эрч хүч орно” гэсэн үг биш. Харин магни хангалттай байх нь биеийн хэвийн энерги үйлдвэрлэл, ашиглалтад зайлшгүй шаардлагатай гэсэн үг.

5. Зүрх болон электролитийн тэнцвэрт ч магни хэрэгтэй

Зүрх бол тасралтгүй агшиж, сулрах булчин. Магни нь зүрхний булчингийн хэвийн үйл ажиллагаа болон натри, кали, кальци зэрэг электролитийн тэнцвэрийг зохицуулахад оролцдог.

Иймээс магни нь зөвхөн хөлний булчинд бус зүрх, мэдрэл, булчингийн бүхэл системийн хэвийн үйл ажиллагаанд чухал.

6. Ясны эрүүл мэндэд кальци ганцаараа хангалтгүй

Ясны тухай ярихад кальци, витамин D хамгийн түрүүнд санаанд ордог. Гэвч бие дэх магнийн нэлээд хэсэг ясанд хадгалагддаг бөгөөд магни нь ясны хэвийн бүтэц, эрдэсжилтийн үйл ажиллагаанд мөн оролцдог.

Тиймээс ясны эрүүл мэндийг дэмжихэд кальци + витамин D + магни + зөв хооллолт + хөдөлгөөн гэсэн цогц үйл ажиллагаа чухал.

Тэгвэл яагаад магнийн цитрат хэлбэр гэж?

Магнийн цитрат нь магнийг нимбэгийн хүчлийн цитрат хэлбэртэй холбосон нэгдэл. Усанд сайн уусдаг тул хүний биед шимэгдэлт өндөр.

Мөн гэдсэнд бүрэн шимэгдээгүй хэсэг нь ус татах осмосын үйлдэл үзүүлдэг учраас өтгөнийг зөөлрүүлж өтгөн хаталтыг бууруулах нөлөө үзүүлдэг.

Товчхондоо

Магни бол зөвхөн шөрмөс татсан үед санадаг эрдэс биш. Тэрээр булчингийн агшилт-сулрал, мэдрэлийн хэвийн сэрэл, нойрны физиологи, энергийн солилцоо, зүрх болон ясны хэвийн үйл ажиллагаанд өдөр бүр оролцож байдаг.

Тиймээс магнийн тухай бодохдоо “шөрмөс таталт” биш, “булчин + мэдрэл + нойр + энерги” гэсэн өргөн хүрээгээр ойлгоорой.

Нийтлэл бичсэн: Хүний их эмч Ч. Оюундарь