Дэлхийн хүн ам дасгал хөдөлгөөнөө нэмэгдүүлэхэд жилд 4-5 сая орчим эндэгдлээс сэргийлэх боломжтойг Нийгмийн Эрүүл Мэндийн Үндэсний Төв (НЭМҮТ)-өөс мэдээллээ.
Алхалтын ач холбогдол нь:
- Зүрх судасны хамгаалалт болдог. Өдөрт ердөө 30 минут хурдан алхах нь зүрхний өвчин болон тархины цус харвах эрсдэлийг 35%-иар бууруулдаг.
- Сахрын хэмжээг тогтворжуулна. Хоол идсэний дараа 10-15 минут алхахад цусан дахь глюкозын хэмжээ эрс буурч, чихрийн шижин хэв шинж хоёроос сэргийлнэ.
- Алхалт нь үе мөчний шингэний эргэлтийг сайжруулж, ясны сийрэгжилтээс сэргийлэх хамгийн аюулгүй хөдөлгөөн юм.
Дасгал хийх цаг гарахгүй байна уу? Өдөр тутамдаа хөдөлгөөн нэмэх энгийн аргууд
Орчин үеийн завгүй амьдралын хэмнэл дунд тогтмол дасгал хийх цаг гаргах амаргүй. Гэхдээ эрүүл мэндээ дэмжихийн тулд заавал фитнесст олон цагаар хичээллэх шаардлагагүй. Өдөр тутмын жижиг дадлуудаа өөрчлөхөд л биеийн хөдөлгөөн нэмэгдэж, эрч хүч сайжирч, эрүүл амьдралын хэв маягт нэг алхам ойртоно.
1. “20/2” дүрмийг хэрэгжүүлээрэй: Хэрэв та суугаа ажилтай бол 20 минут тутамд босож, 2 минут алхах эсвэл сунгалтын хөдөлгөөн хийхийг хичээгээрэй. Богино хугацааны энэ хөдөлгөөн нь булчин чангарахаас сэргийлж, цусны эргэлтийг дэмжинэ. Компъютерын ард удаан суух шаардлагатай хүмүүсийн хувьд энэ нь хамгийн энгийн бөгөөд үр дүнтэй дадал юм.
2. Цахилгаан шатны оронд шатаар өгсөөрэй: Өдөр бүр цахилгаан шат ашигладаг бол боломжтой үедээ энгийн шатаар өгсөж, бууж байгаарай. Шатаар алхах нь зүрх судасны үйл ажиллагааг дэмжиж, хөлийн булчинг ажиллуулдаг сайн хөдөлгөөн юм. Эхэндээ нэг эсвэл хоёр давхраас эхэлж, аажмаар нэмэгдүүлж болно.
3. Зорьсон газраасаа бага зэрэг өмнө буугаарай: Нийтийн тээврээр зорчдог бол очих газраасаа 1–2 буудлын өмнө бууж алхахыг дадал болгоорой. Харин автомашинаар явдаг бол зорьсон газраасаа бага зэрэг зайтай зогсоол сонгож болно. Ингэснээр өдөр тутмын алхалтын хэмжээ нэмэгдэж, тусгайлан цаг гаргахгүйгээр хөдөлгөөнөө нэмэх боломжтой.
4. Утсаар ярихдаа алхаж хэвшээрэй: Утсаар ярьж байхдаа суухын оронд өрөөгөөрөө тойрон алхах, коридороор явах зэрэг жижиг хөдөлгөөн хийж болно. Ажлын дундуур богино дуудлага хийх үед ч энэ дадлыг хэрэгжүүлэхэд тохиромжтой. Жижиг мэт боловч өдөр бүр давтагдвал таны биеийн идэвхийг мэдэгдэхүйц нэмэгдүүлнэ.
