Ерөндөг тавиулсны дараа үтрээний үрэвсэл яагаад үүсдэг вэ?

Ерөндөг тавиулсны дараа үтрээний үрэвсэл яагаад үүсдэг вэ?

Ерөндөг буюу спираль нь өөрөө бактери үүсгэдэг зүйл биш ч тавигдах явц болон бие махбодын хариу урвалаас шалтгаалан зарим эмэгтэйчүүдэд үтрээний үрэвсэл үүсэх эрсдэл байдаг. Үүнд дараах шалтгаанууд нөлөөлнө.

1. Халдвар авах - Ерөндөг тавих үед ариун цэврийн дэглэм алдагдах эсвэл ажилбараас өмнө үрэвсэлтэй байсан ч эмчлүүлээгүй эсвэл дутуу эмчлэгдсэн тохиолдолд үрэвсэл үүсэх магадлалтай.

2. Үтрээний орчны тэнцвэр алдагдах - Зарим эмэгтэйчүүдийн хувьд ерөндөг тавиулсны дараа үтрээний орчин өөрчлөгдөж ашигтай болон хортой бактерийн тэнцвэр алдагдаж, үүний улмаас эвгүй үнэртэй ялгадас, загатнах, хорсох шинж илэрч болдог.

3. Дархлааны хариу урвал - Зарим хүний бие спиральд хэт мэдрэг байж, дархлааны урвал үүсгэж улмаар үрэвсэл үүсэж болдог.

Ерөндөг тавиулсны дараа анхаарах зүйлс:

1. Ариун цэврийг зөв сахих

• Өдөрт 1–2 удаа бүлээн усаар гадна бэлэг эрхтнээ зөөлөн угаах
• Хүчтэй үнэртэй саван, үтрээ угаагч хэрэглэхээс зайлсхийх

2. Дотуур хувцсаа зөв сонгох

• Хөвөн даавуун дотуур хувцас өмсөх, хэт бариу, синтетик материалтай дотуур хувцсыг удаан өмсөхгүй байх
• Чийгтэй, бохир дотуур хувцсыг даруй солих

3. Бэлгийн харьцаанд анхаарах

• Ерөндөг тавиулснаас хойш 7–10 хоног бэлгийн харьцаанд орохгүй байх
• Байнгын бус бэлгийн хавьтагчтай бол бэлгэвч хэрэглэх

4. Эмчийн хяналтад тогтмол орох

• Ерөндөг тавиулснаас хойш 1 сарын дараа заавал хянуулна
• Дараа нь жилд 1–2 удаа эмэгтэйчүүдийн үзлэгт орж ерөндөг хэвийн байрласан эсэхийг шалгаж байх 

5. Дархлаагаа дэмжих

• Сайн амрах, стрессээ багасгах
• Эмчийн зөвшөөрөлгүй антибиотик дураараа хэрэглэхгүй байх 

Дараах шинж илэрвэл яаралтай эмчид хандаарай

• Үтрээний эвгүй үнэртэй, өнгөтэй ялгадас
• Загатнах, хорсох, өвдөх
• Халуурах, доош базлах өвдөлт
• Бэлгийн харьцааны үед өвдөх